Kynlífskvikmyndir hafa ófarsæl áhrif á 12-14 ára börn

Sérfræðingar við bandarískan háskóla sem einna næstur okkur er á landakorti gerðu rannsókn á kvikmyndaáhuga 12-14 ára krakka og fundu ótvíræð tengsl milli áhorfs á kynlífsatriði og mikils, fjöllynds og óvarins kynlífs sex árum seinna. Margföld tengsl komu þar í ljós:

• Niðurstöðurnar bentu til þess að þátttakendur í rannsókninni væru fimmfalt líklegri til að missa sveindóm/meydóm á næstu sex árum fyrir hverja einustu klukkustund af áhorfi á kynferðislegt efni.
• „Unglingar sem horfa mikið á kynferðislegt efni í kvikmyndum byrja yngri að stunda kynlíf, eiga fleiri bólfélaga og eru ólíklegri til þess að nota smokka með þeim,“ sagði dr. Ross O'Hara, sem fór fyrir rannsókninni.
• „Þessi rannsókn og heimfærsla hennar á aðrar rannsóknir benda til þess að foreldrar verði að koma í veg fyrir að ung börn þeirra horfi á kynlífsatriði í kvikmyndum.“ (Mbl.is, nánar þar, í tengli hér fyrir neðan, um framkvæmd rannsóknarinnar, sem náði til 1.228 barna.)

Íslendingar státa gjarnan af ágæti frelsisins, nauðsyn "umburðarlyndis" -- en oft í því einfalda formi að gefa óstýrilátum, ábyrgðar-óvönum unglingum lausan tauminn í stað þess að fylgjast með og taka meiri þátt í lífi þeirra, sleppa ekki of snemma af þeim hendinni, heldur hjálpa þeim að "fylla upp í tíma sinn" með gefandi og þroskandi hætti.

Það er ekki fagur vitnisburður um foreldra, ef þeir hyggjast svo bæta upp ábyrgðarleysi sitt í leiðsögn barna sinna með því að þrýsta þeim til fósturdeyðingar eftir óvarið kynlíf í mörgum skyndikynnum, en ófá eru dæmi slíks og hafa í sumum tilfellum komið niður á þessum börnum sjálfum, því að fósturdeyðing er ekki hættulaust fyrirbæri fyrir viðkomandi, þungaða móður. Meðal svæsnustu eftirkasta aðgerðanna eru ófrjósemi, miklar blæðingar og andleg vanlíðan.

Hér hefur þó einnig, hjá heilbrigt hugsandi fólki, verið landlægt, jákvætt umburðarlyndi fyrir barneignum kvenna undir tvítugu, ekki sízt úti á landi, og samhjálp að auki eftir fæðinguna. Þessi náttúrlegi þankagangur á nú í vök að verjast, einkum í þéttbýlinu, vegna áherzlu margra á að setja öflun menntunar og starfsframa í forgang, og undir þetta róa félagspólitísk öfl jafnt sem ýmsir áhrifamiklir fulltrúar heilbrigðiskerfisins.

Jón Valur Jensson.

Kynlífsatriði umturna unglingum