"Verið að lögleiða vændi á Íslandi"

Þingmenn allra flokka samþykktu í gær frumvarp um lagabreytingu vegna kynferðisafbrota. Sumt í því er til góðs, en mikið áfall að komast að raun um að nú er búið að lögleiða vændi á Íslandi ! - Kristin stjórnmálasamtök eru því gersamlega andvíg og furða sig á því andvaraleysi mestalls Fjórflokksins og hálfs þingflokks Frjálslyndra að greiða svo kvenfjandsamlegri lagabreytingu atkvæði sitt. Enginn þingmaður sagði nei í atkvæðagreiðslunni, en 52 sögðu já! Fjarverandi voru 11 þingmenn. Mikill meirihluti þingmanna allra flokka kaus þannig að greiða götu vændis á Íslandi!

Hafa þessi þingmenn virkilega ekkert lært? Hvar er trúnaður þeirra við það ógæfusama fólk sem leiðist út í vændi, en verður nú gert miklu aðgengilegra fyrir hvatir annarra og lokkandi peningatilboð á "markaðnum"? En hér geta menn lesið hvernig atkvæði féllu um lokagerð fumvarpsins; það er ótrúlegur raunalestur!

Sannarlega má fagna því að fyrning hefur verið afnumin á kynferðsbrotum gegn börnum. En þegar þingmenn taka eitt skref áfram, þurfa þeir ekki að taka tvö skref aftur á bak um leið með því að kippa úr sambandi öllum refsileiðum gagnvart vændisstarfsemi í landinu og opna þannig á umsvifamikla atvinnustarfsemi á þessu lögheimilaða sviði.

Atli Gíslason hæstaréttarlögmaður, varaþingmaður Vinstri grænna, sem hefur m.a. starfað við að gæta hagsmuna fórnarlamba kynferðisbrota, var í viðtali í fréttum Ríkisútvarpsins kl. 18 í dag og sagði þar orðrétt:

Auk þess er ég mjög ósáttur við vændisákvæðið og ég segi að það sé allt að því verið að lögleiða vændi á Íslandi.

Þessu var líka slegið upp í fréttayfirlitinu fyrst í fréttatímanum þar sem sagði: "Með breytingum á kynferðisbrotalögum, sem samþykkt voru á Alþingi í gær, er nánast verið að lögleiða vændi á Íslandi. Þetta er mat Atla Gíslasonar hæstaréttarlögmanns." En í fréttinni sjálfri bætti fréttamaðurinn þessum orðum frá eigin brjósti við ummæli Atla:

Með "vændisákvæði" er átt við að ekki er lengur refsivert að stunda vændi, heldur aðeins að hafa af því framfærslu. Hins vegar var ekki gert refsivert að kaupa vændi, eins og margir höfðu farið fram á.

Þarna skjáltlast fréttamanninum illa, því að frumvarpið tilgreinir engin ákvæði um refsingu fyrir sölu né kaup vændis, þar sem í hlut eiga tvær persónur eingöngu og báðar yfir lögaldri - nú verður einmitt heimilt að hafa framfærslu sína af því! Orðrétt hljóðar nú ákvæðið um vændi þannig í hinum nýsettu lögum (feitletranir settar í þessa birtingu textans; 206. greinin, sem nefnd er, er í hegningarlögunum):

12. gr.

206. gr. laganna orðast svo:

Hver sem hefur atvinnu eða viðurværi sitt af vændi annarra skal sæta fangelsi allt að 4 árum.

Sömu refsingu varðar það að ginna, hvetja eða aðstoða barn yngra en 18 ára til vændis.

Sömu refsingu varðar það einnig að stuðla að því að nokkur maður flytji úr landi eða til landsins í því skyni að hann stundi vændi sér til viðurværis.

Hver sem stuðlar að því með ginningum, hvatningum eða milligöngu að aðrir hafi samræði eða önnur kynferðismök gegn greiðslu eða hefur tekjur af vændi annarra, svo sem með útleigu húsnæðis eða öðru, skal sæta fangelsi allt að 4 árum en sektum eða fangelsi allt að 1 ári ef málsbætur eru.

Hver sem í opinberri auglýsingu býður fram, miðlar eða óskar eftir kynmökum við annan mann gegn greiðslu skal sæta sektum eða fangelsi allt að 6 mánuðum.

Þarna er hvergi verið að banna einstaklingi að stunda sjálfur vændi (án melludólgs) né að hafa framfærslu sína af því. Undantekningarnar frá þessu leyfi varða allar aðra hluti: aðild 3. aðila að vændissölu eða kaupum, ginningu fólks eða meðalgöngu til vændis sem og opinberar auglýsingar. Þetta kemur ekki í veg fyrir að það spyrjist út í heim að hér geti ferðamenn keypt sér "vændisþjónustu" án þess að taka neina áhættu á því að verða lögsóttir fyrir vikið - og "vændissalinn" tekur enga slíka áhættu heldur, ef hann/hún varar sig á þessum undantekningum í 12. grein laganna. Misskilningur fréttamanns Ríkisútvarpsins á þessu höfuðatriði í lögunum er því vægast sagt afgerandi - og ætti fréttastofa útvarps að leiðrétta þau!

Nokkur umræða hefur spunnist um þetta mál - Kristin stjórnmálasamtök verða ekki ein um að mótmæla og aðrir, auk Atla, hafa nú þegar mótmælt þessu frumvarpi eða lögum: sjá hér og hér á Moggablogginu, ennfremur þetta viðbragð og andóf í Silfri Egils í dag.

Það er lærdómsríkt af þessum umræðum að í löggjöfinni er hvergi gert ráð fyrir fjárveitingu til eftirlits með vændisstarfseminni. Þannig verður, í 1. lagi, auðvelt að stunda hér "svarta" (já: skattfrjálsa!) vinnu á þessu sviði, í 2. lagi verður heilbrigðiseftirliti áfátt, enda engin tilkynningarskylda um starfsemina og hvergi gert ráð fyrir einni krónu til að kosta það eftirlit - sem ætti þó að vera nauðsynlegt þar sem búast má við innflutningi fólks til þessarar atvinnustarfsemi frá Austur-Evrópu þar sem hættulegir kynsjúkdómar eru miklu algengari en hér; afleiðingin getur orðið víðtækari útbreiðsla þeirra sjúkdóma jafnvel meðal þeirra sem oft "sofa hjá" við frjáls og óborguð kynni. En í 3. lagi verður naumast mikið eftirlit "á staðnum" með því hvort í raun og veru sé um mansal og þrælkun að ræða að baki vændisstarfi og ekki síst getur það átt við um austurevrópsku konurnar.

Við lýsum yfir undrun okkar og hryggð vegna þess að yfirmaður kirkjumála í landinu átti stóran þátt í þessari löggjöf þar sem hann var flutningsmaður frumvarpsins. En vakandi kristnum mönnum - og öðru meðvituðu fólki um nauðsyn grundvallar siðferðis - verður þessi hneykslanlega lagabreyting hvatning til að strengja þess heit að leggja sig fram um að fá þessi lög afnumin. Þar á að leita samvinnu við öll góð öfl í samfélaginu, t.d. áðurnefndan Atla Gíslason og samtök kvenna.

Vitið þér ekki, að líkamir yðar eru limir Krists? Á ég þá að taka limi Krists og gjöra þá að skækjulimum? Fjarri fer því. Vitið þér ekki, að sá er samlagar sig skækjunni verður ásamt henni einn líkami? Því að sagt er: "Þau tvö munu verða eitt hold." En sá er samlagar sig Drottni er einn andi ásamt honum. Flýið saurlifnaðinn! Sérhver önnur synd, sem maðurinn drýgir, er fyrir utan líkama hans. En saurlífismaðurinn syndgar á móti eigin líkama. Vitið þér ekki, að líkami yðar er musteri heilags anda, sem í yður er og þér hafið frá Guði? Og ekki eruð þér yðar eigin. Þér eruð verði keyptir. Vegsamið því Guð með líkama yðar. (1. Korintubréf, 6,15-20).

Oft hefur verið talað um þörf á því að forseti Íslands staðfesti ekki ný lög með undirskrift sinni, en hér er nauðsyn. Enginn velviljaður maður vill að land okkar verði að vændisnýlendu erlendra ferðamanna né að siðferði og heilsuöryggi Íslendinga verði spillt með þessum illa hugsaða gerningi. Við viljum því beina þeirri virðingarfullu bón til herra Ólafs Ragnars Grímssonar, forseta Íslands, að hann synji þessum lögum um staðfestingu, svo að nýtt og óþreytt Alþingi geti tekið málið upp aftur á því vor- eða sumarþingi sem boðað hefur verið. Leyfi til refsilauss vændis á aldrei að fá fastan samastað í lagasafni Íslands.

 

K1