Björn Valur virðist ekki kunna að skammast sín fyrir ógnandi tal gagnvart valdi forsetans

Hann segir nú við erlenda fréttastofu, að "ef ekkert heyrist frá forseta Íslands í dag um hvenær hann taki afstöðu til Icesave-laganna, hljóti Jóhanna Sigurðardóttir forsætisráðherra að hafa samband við hann í kvöld og hvetja hann til að taka ákvörðun á hvorn veginn sem er." Þetta er að setja spennu á forsetann, og er Björn líklega notaður til þessa óþrifaverks fyrir sína flokksforystu, en þetta er alvarlegt mál gagnvart stjórnarskrárvörðum rétti forsetans til sinnar ákvörðunar án þrýstings frá framkvæmda- eða þingræðisvaldinu, en Björn Valur er varaformaður fjárlaganefndar. Hvernig hann komst í þann stól er undirrituðum hulin ráðgáta, en ekki var hann þekktur að sérþekkingu í fjármálum, áður en hann tók við þeirri stöðu, glænýr á Alþingi, og hann hefur raunar hlaupizt undan verkum verulegan tíma á árinu, þegar mest mæddi á nefndinni í Icesave-málinu, til að sinna sjómennsku.

• „Það þarf að fá niðurstöðu í þetta mál áður en fjármálamarkaðir verða opnaðir á ný í fyrramálið," hefur Bloomberg eftir Birni Val.

Þetta væri nú alveg bráðhlægilegt, ef ekki væri fyrir þá sök, að hér vill Björn Valur setja hættulega tímapressu á forsetann. En hver tekur mark á svona hræðsluáróðri manns sem naumast nokkurt vit hefur á fjármálum?

• Árni Sigurjónsson, skrifstofustjóri skrifstofu forsetans, segir við Bloomberg, að engin ákvörðun hefði verið tekin um hvenær forsetinn tilkynni um niðurstöðu sína. „Hann mun skoða málið í dag. Það er ekkert um þetta að segja eins og er, það er verið að skoða spjöldin."

Já, vitaskuld þarf forsetinn að skoða málið, það hefur svo margt verið að koma fram nýtt um það á síðustu vikum, t.d. bara um hina hneykslanlegu vaxta-hlið samninganna, svo að nokkuð sé nefnt. 

• Björn Valur segir jafnframt við Bloomberg, að staðfesti forsetinn ekki Icesave-lögin þýði það endalok ríkisstjórnar Samfylkingarinnar og Vinstrihreyfingarinnar-græns framboðs.

Það er sem sé gamla hótunarlagið á því: reynt að stjórna í krafti sífelldra ógnana, hvort heldur það er gagnvart eigin þingmönnum eða jafnvel forsetanum sjálfum!

Mál er að linni. 

PS. Þeir flokksmenn eru gjarnan kallaðir jarðýtur, sem beita sér gróflega fyrir flokkseigendur sína; þykir sums staðar líklegt til frama að gera sem mest af þessu tagi til að þókknast foringjunum. Nú í kvöldfréttum Rúv bættist Sigríður Inga Ingadóttir Samfylkingarkona í lið með Birni Vali í þeirri freku viðleitni að þrýsta á forsetann, en þetta framferði sitt byggja þau vitaskuld ekki á málfrelsi sínu sem einstaklingar, heldur á stöðu sinni í þinginu og flokkunum. En hræðsluáróður Björns Vals um, að það leiki lánshæfisvísitölu okkar grátt, að ákvörðun um Icesave-lögin dragist fáeina daga,* missti loftið úr blöðrunni, þegar Ólafur Ísleifsson hagfræðingur benti á það í sömu kvöldfréttum, að breyting á lánshæfisvísitölu hefði engin áhrif nú um stundir, því að við erum hvorki að taka ný lán né endurnýja önnur!

* Taka ber fram, að frá samþykkt fjölmiðlalaganna 2004 liðu átta dagar, þar til forsetinn kvað upp úr um synjun sína á lögunum, en nú í kvöld eru fjórir dagar frá samþykkt Icesave-ólaganna.

Jón Valur Jensson.

Nauðsynlegt að fá niðurstöðu fljótt

Athugasemdir

[Ingibjörg Guðrún Magnúsdóttir, 3.1.2010 kl. 17:58]

Mikið hjartanlega er ég sammála þér Jón Valur.

[Ingvi Rúnar Einarsson, 3.1.2010 kl. 21:07]

Björn Valur er gott einkenni Júdasar.Hann komst á þing,að tilstilli sjómanna,en var þó fyrstur til mæla með afmáð sjómannaafsláttinn.

Hann veit það líka,að sjómenn eru ekki tilbúnir að ganga í ESB,en verður sá fyrsti,að róa að þeim miðum.Sjálfsagt búinn að stilla sjálfstýringuna,eftir reiknaðri stefnu.Ég vona að,sterkir straumar beri hann af leið.